ஜப்பானின் அமைதிப் பெருங்கடல் கடற்கரையை நோக்கி 'டுஜுவான்' எனும் சக்திவாய்ந்த சூறாவளிப் புயல் நகர்ந்து வரும் நிலையில், தலைநகர் டோக்கியோவை உள்ளடக்கிய கான்டோ பிராந்தியம் மற்றும் கிழக்கு ஜப்பானின் பல பகுதிகளில் கடும் மழை, காற்று மற்றும் மண்சரிவு  அபாயம் குறித்து வானிலை ஆய்வு மையம் எச்சரிக்கை விடுத்துள்ளது.டுஜுவான் புயலானது டோக்கியோ பெருநகரப் பகுதியை நோக்கி நெருங்கி வருவதால், வானிலை நிலைமைகள் அதிவேகமாக மோசமடையக்கூடும் என ஜப்பான் வானிலை ஆய்வு மையம் எச்சரிக்கை விடுத்துள்ளது.ஜப்பானில் சமீபத்திய ஆண்டுகளில் பெரும் கவலையை ஏற்படுத்தி வரும் 'நேரியல் மழைப் பட்டைகள்' உருவாகக்கூடும் எனக் கூறப்பட்டுள்ளது. இவை குறுகிய பரப்பளவில் சில மணிநேரங்களுக்குத் தொடர்ச்சியாக அதிகளவிலான மழையைக் கொட்டித் தீர்க்கும் திறன் கொண்டவை.விடுமுறை தினங்களைக் குறிவைத்து வரும் இப்புயல் காரணமாக டோக்கியோவின் பூங்காக்கள், கண்காட்சிகள் ரத்து செய்யப்பட்டுள்ளதுடன், தொடருந்து சேவைகளும் ஓரளவு இடைநிறுத்தப்பட்டுள்ளன.அய்ச்சி மாகாணத்தில் நடைபெற்று வரும் ஆசிய விளையாட்டுப் போட்டிகளின் சில நிகழ்வுகள் புயல் காரணமாக ஒத்திவைக்கப்பட்டுள்ளன.உலகெங்கிலும் தீவிர காலநிலை மாற்றங்கள், எதிர்பாராத வெள்ளப்பெருக்குகள் மற்றும் புயல்கள் அதிகரித்து வரும் நிலையில், கிழக்கு ஆசிய பிராந்தியத்தில் இந்த ஆண்டின் 25 ஆவது புயலாக 'டுஜுவான்' அச்சுறுத்தி வருகின்றது.